Wasaaradda Arrimaha Gudaha, Federaalka iyo Dimuqraadiyeynta Dawladda Puntland ayaa si rasmi ah u shaacisay in la dib dhigay fadhigii labaad ee kalfadhiga 30-aad ee Golaha Deegaanka Degmada Gaalkacyo.
Go’aankan ayaa yimid kadib markii la tixgeliyay warqad ka timid Xafiiska Guddoomiyaha Gobolka Mudug oo ku saabsan xaaladda amni ee Gobolka iyo talo soo jeedin la xiriirta dib u dhigidda fadhiga. Warqaddaas ayaa sumaddeedu ahayd MGM/XG/DPL/SOM/153/2025 kuna taariikheysneyd 20 Luuliyo 2025.
Wasaaraddu waxay sheegtay in arrintani ay tahay mid ku saleysan danta guud iyo xasilloonida siyaasadeed ee gobolka. Waxaana lagu wargeliyay Guddoomiyaha Golaha Deegaanka, xubnaha golaha, iyo hay’adaha kala duwan ee khuseeya in fadhiga dib loo dhigay illaa waqti dambe oo la shaacin doono.
Wasaaradda Arrimaha Gudaha ayaa intaa ku dartay in go’aan dambe laga gaari doono waqtiga ugu habboon ee lagu qaban karo fadhiga Golaha Deegaanka ee Degmada Gaalkacyo.
Dhanka kale Inta badan xubnaha golaha degaanka Gaalkacyo oo mooshin ka gudbiyay duqa degmadaasi, Maxamed Cabdirisaaq Daacad ayaa ka horyimid go’aan ka soo baxay wasaaradda arrimaha gudaha Puntland, kaasi oo dib loogu dhigay Kal-fadhigii golaha.
23 xubnood oo ka tirsan golaha degaanka Gaalkacyo, kuwaasi oo ku saxiixan mooshinkii laga keenay duqa degmada ayaa ka horyimid go’aanka wasaaradda oo ay ku tilmaameen mid khilaafsan dastuurka iyo shuruucda Puntland, islamarkaana waxay sheegeen in aysan u hoggaansami doonin go’aankaasi.
