Weerar bambaano loo adeegsaday iyo mid toos ah ayaa lagu qaaday maanta dhisme maxkamadeed oo ku yaalla gobolka Sistan-Baluchestan ee koonfur-bari Iran, waxaana weerarka kaddib tallaabo deg deg ah qaaday ciidamada amaanka ee dalka Iran.
Warbaahinta dalka Iran , ayaa tabisay in weerarkan bambaano ee maanta lagu qaaday maxkamadda uu sababay geerida shan qof iyo dhaawaca 13 qof oo kale, waxaana dadka dhaawacyada soo gaareen qaarkood la sheegay in dhaawacyo culus qabaan.
Ciidamada amaanka dowladda Iran , ayaa weerarka kaddib la sheegay in ay toogteen saddex nin oo ahaa ragii weerarka fuliyay, waxaana durba masuuliyadda weerarkan sheegatay kooxda sunniga ah ee Jaish al-Adli, oo sheegtay in weerarka u geesteen caddaalad darro iyo dulmi lagu hayo bulshada sunniga ah.
Kooxo Islaamiyiin sunni ah ayaa ka dagaallama qeybo kamid ah dalka Iran, kuwaa oo ka cabanaya dhibaatooyin iyo dulmi si gaar ah bulshadooda loogu hayo, waxa ayna dowladda Iran cadaadis xooggan saartaa dadka aan shiicada aheyd ee kunool dalkaasi.
