Dagaalka xooggan ayaa saaka markale ka qarxay deegaanka Tuulo Aamin ee hoostagta magaalada Beled-Xaawo, kadib markii ciidamo ka tirsan Dowladda Federaalka Soomaaliya ay weerar qorsheysan ku qaaday ciidanka Jubbaland oo ku sugnaa Tuuladaasi.
Wararka ayaa sheegaya in labada dhinac ay isu adeegsadeen hub culus iyo mid fudud, waxaana la maqlayay jugta madaafiic iyo rasaas culus oo ka dhacaysa gudaha iyo hareeraha deegaanka. Dadka deegaanka ayaa bilaabay inay guryahooda ka barakacaan, iyagoo ka baqaya in dagaalka uu ku faafo tuulooyinka deriska ah.
Ciidanka Jubbaland ayaa maalmahii lasoo dhaafay halkaas ka sameynayeen dhaq-dhaqaaqyo ciidan.
Illaa iyo hadda lama helin tiro rasmi ah oo ku saabsan khasaaraha ka dhashay dagaalka oo soo kala gaaray labada dhinac.
Dowladda Federaalka iyo Maamulka Jubbaland ayaan weli si rasmi ah uga hadlin dagaalka saaka qarxay.
Waxaa xusid mudan in Beled-Xaawo iyo nawaaxigeeda ay horey uga dhaceen iska horimaadyo la mid ah kan saaka, kuwaas oo salka ku haya khilaaf siyaasadeed iyo mid amni oo soo jiitamayay sanadihii lasoo dhaafay.
