Dowladda Shiinaha ayaa shaacisay qorshe cusub oo ay ku soo jiidanayso dhallinyarada hibada u leh cilmiga iyo tiknoolajiyada, iyadoo bilaabi doonta fiiso gaar ah oo loogu talagalay dhalinyarada hal-abuurka leh.
Fiisadan cusub ayaa u oggolaan doonta aqoonyahanno da’yar iyo hal-abuurayaal ka kala imanaya dalal kala duwan inay si fudud ku galaan Shiinaha, halkaas oo ay ka heli doonaan xarumo casri ah oo loogu talagalay cilmi-baarista, hal-abuurka iyo tababarrada xirfadeed.
Wakaaladda Wararka Shiinaha ee Xinhua ayaa sheegtay in tallaabadani qayb ka tahay istiraatiijiyadda Shiinaha ee ku wajahan hoggaaminta horumarka tiknoolajiyada caalamka, iyadoo xoogga la saarayo meelaha ay ka mid yihiin sirdoonka macmalka ah (AI), bay’oolojiga, iyo horumarka dhijitaalka ah.
Khabiirro ayaa tilmaamay in arrintani ay Shiinaha u noqon karto fursad uu ku xoojiyo saameynta caalamiga ah ee dhinaca sayniska iyo tiknoolajiyada, xilli ay tartan adag kala jiraan dalal kale oo awood leh.
“Mustaqbalka maanta wuxuu si toos ah ugu xirnaan doonaa cidda hoggaamisa tiknoolajiyada,” ayay ku warrantay Xinhua, iyadoo muujisay sida Shiinaha ugu heelan yahay inuu noqdo xarunta ugu weyn ee hal-abuurka mustaqbalka.
