Madaxweynaha Soomaaliya Xasan Sheekh Maxamuud ayaa la filayaa inuu saacadaha soo socda gaaro magaalada Kismaayo ee xarunta gobolka Jubbada Hoose, halkaas oo uu kulan fool-ka-fool ah kula yeelan doono Madaxweynaha Jubbaland, Axmed Maxamed Islaam (Axmed Madoobe).
Wadahadalladan ayaa kusoo aadaya xaalad siyaasadeed oo kacsan, kadib markii horey maxkamadda gobolka Banaadir ay soo saartay amar soo qabasho ah oo ka dhan ah Axmed Madoobe, halka Golaha Wasiirrada dowladda federaalka ahna ay horey u soo saareen qaraar adag oo lagu eedeeyay inuu xiriir la leeyahay Al-Shabaab.
Socdaalka Madaxweynaha Soomaaliya wuxuu salka ku hayaa waanwaan culus oo ay wadeen dalalka Kenya, Imaaraadka Carabta iyo Itoobiya, iyadoo dowladda Kenya ay hoggaamineyso dadaalladaas, waxaana hogaaminaya madaxa sirdoonka Kenya, Nuuradiin Yuusuf Xaaji.
Wafdi hordhac u ah Madaxweynaha ayaa maanta gaaray magaalada Kismaayo, kuwaas oo ka kooban saraakiil ciidan iyo masuuliyiin ka tirsan Madaxtooyada Soomaaliya. Waxaa sidoo kale magaalada soo gaaray saraakiil iyo wakiillo ka socda sirdoonnada Kenya iyo Itoobiya.
Dhanka kale, Madaxweynaha Jubbaland Axmed Madoobe ayaa maanta kulan kula yeeshay odayaasha dhaqanka iyo hoggaamiyeyaasha bulshada ee taageera, isagoo u sheegay in wadahadalkan uu yahay mid “culeys dibadeed lagu keenay”, isla markaana aanu ka imaan rabitaan dhexdiisa ah ama mid Villa Soomaaliya ah, balse uu yahay cadaadis ay saareen dalalka deriska ah.
Kismaayo ayaa haatan laga dareemayaa diyaar garow weyn oo loogu jiro soo dhoweynta Madaxweyne Xasan Sheekh, iyadoo la filayo in saacadaha soo socda ay dowladda federaalka si rasmi ah uga hadasho eedihii lagu soo oogay Axmed Madoobe iyo suuragalnimada in laga noqdo amaradii hore.
Wadahadalka Xasan Sheekh iyo Axmed Madoobe ayaa la filayaa inuu noqdo mid adag oo tanaasul badan u baahan, iyadoo dowladda Kenya ay door muuqda ku yeelan doonto gogosha heshiisiinta labada dhinac.
Ajendayaasha rasmiga ah ee wadahadalka weli lama shaacin, balse ilo diblomaasiyadeed ayaa sheegaya in natiijada kulankan ay saamayn weyn ku yeelan doonto mustaqbalka xiriirka u dhexeeya Jubbaland iyo Villa Soomaaliya.
