Madaxweynaha maamulka Hirshabelle Cali Guudlaawe Xuseen, ayaa wareegto uu maanta soo saaray waxa uu xilka uga qaaday guddoomiyihii gobolka Hiiraan Mudane Muuse Salaad Wehliye, waxa uuna Cali Guudlaawe xilkaasi u magacaabay guddoomiye cusub.
Wareegtada uu soo saaray Madaxweynaha Hirshabelle , ayaa loogu magacaabay Maxamed Xuseen Maxamed (Carab) in uu noqdo guddoomiyaha cusub ee gobolka Hiiraan, lamana sheegin sababta xilka looga qaaday guddoomiyihii hore ee gobolka Hiiraan.
Warar soo baxaya ayaa sheegaya in Madaxweynaha Hirshabelle iyo kuxigeenkiisa uu khilaaf xooggan kala dhaxeeyay guddoomiyaha gobolka Hiiraan ee xilka laga qaaday, waxaana khilaafka masuuliyiintan uu noqday mid marar badan lagu guul dareestay in xal loo helo.
Guddoomiyaasha gobolka Hiiraan loo magacaabo ayaa marar badan is beddel lagu sameeyaa, waxaana inta badan is beddel keena khilaaf siyaasadeed iyo mid maaliyadeed oo soo kala dhax gala Madaxda sare ee maamulka Hirshabelle iyo guddoomiyaha gobolka Hiiraan.
