Hoggaamiyaha Koonfur Galbeed, Sheekh Aadan Maxamed Nuur (Aadan Madoobe), ayaa maanta kulan ku qaabilay guddoomiyihii hore ee deegaanka Awdiinle, Ibraahim Maxamed Nuur (Kalaay), kaas oo shalay isaga iyo ciidamo badan ku biiray maamulka Koonfur Galbeed.
Kulanka ayaa diiradda lagu saaray xoojinta nabadda, amniga iyo sidii loo dardargelin lahaa geeddi-socodka dowlad-dhiska ee deegaannada maamulka Koonfur Galbeed.
Aadan Madoobe ayaa si diirran u soo dhaweeyay Ibraahim Maxamed Nuur (Kalaay), isagoo ku ammaanay go’aankiisa ku aaddan ku biirista maamulka, islamarkaana ku tilmaamay tallaabo muhiim u ah xasilloonida iyo mideynta bulshada.
Kulanka waxaa sidoo kale goobjoog ka ahaa Wasiirka Amniga Gudaha ee Koonfur Galbeed, Isaag Maxamed Isaag (Korsaar), oo adkeeyay muhiimadda ay leedahay in mas’uuliyiinta iyo ciidamada ay ku biiraan dadaallada nabadda iyo dowlad-dhiska.
Ku biirista Kalaay iyo ciidamadiisa ayaa kusoo beegmaysa xilli maamulka Koonfur Galbeed uu wado dadaallo lagu xoojinayo amniga iyo dib u heshiisiinta deegaannada maamulka.
