Ra’iisul Wasaaraha Itoobiya, Abiy Axmed, ayaa wajahaya xaalad siyaasadeed oo aad u xasaasi ah, kaddib go’aankii Israa’iil ay ku aqoonsatay Somaliland, arrin Itoobiya gelisay loollan istiraatiiji ah oo u dhexeeya Shiinaha iyo Imaaraadka Carabta.
Wargeyska The Africa Report ayaa qoray in Shiinaha si cad ugu digay Itoobiya iyo dalalka kale ee gobolka inaysan taageerin ama aqoonsan Somaliland, maadaama Beijing ay arrintaas u aragto mid khatar ku ah mabda’a midnimada dalalka.
Dhanka kale, Imaaraadka Carabta ayaa leh joogitaan ballaaran oo dhaqaale iyo mid amni oo ka jira Somaliland, waxaana lagu eedeeyay inuu door ku leeyahay dadaallada la xiriira aqoonsiga Somaliland ee Israa’iil.
Warbixintu waxay sheegtay in Ra’iisul Wasaare Abiy Axmed uu qaatay mowqif dhexdhexaad ah, isagoo ka fogaanaya inuu si cad ula safato midkood Shiinaha ama Imaaraadka, si uu u ilaaliyo xiriirka labada quwadood.
Itoobiya ayaa xilligan u baahan maalgelin iyo deymo ka imanaya Shiinaha, halka Imaaraadkuna uu ballanqaaday taageero dhaqaale iyo mid milatari, oo ay ku jiraan diyaaradaha aan duuliyaha lahayn.
Addis Ababa ayaa lagu soo warramayaa inay si xeeladaysan u maareyneyso loollanka quwadahaas, si aysan u lumin midkoodna ama u gelin qalalaase siyaasadeed iyo mid dhaqaale.
