Mal4eshiyaadka Al-Shabaab ayaa waaberigii saaka weerar culus oo qaraxyo ku billaawday ku qaaday saldhigyo ay ku sugnaayeen ciidanka dowladda Federaalka Soomaaliya iyo kuwa howlgalka ATMIS (AUSSOM) ee ku yaalla deegaanka Sabiid, oo hoos taga degmada Afgooye.
Weerarka ayaa la xaqiijiyay inuu ku billaawday qaraxyo waaweyn, kuwaas oo lagu beegsaday saldhigyada ciidanka, waxaana markiiba xigay dagaal fool-ka-fool ah oo u dhaxeeyay maleeshiyaadka Al-Shabaab iyo ciidamada difaacayay xarumaha la weeraray.
Goobjoogayaal ku sugan deegaanka Sabiid ayaa sheegay in ciidamada dowladda iyo kuwa ATMIS ay sameeyeen iska caabin adag, waxaana wali laga maqlayaa rasaas goos goos ah iyo dhaq-dhaqaaqyo ciidan oo ka socda halkaasi.
Inkasta oo aan la haynin tiro rasmi ah oo ku saabsan khasaaraha, haddana wararka hordhaca ah ayaa tilmaamaya in uu jiro khasaaro dhimasho iyo dhaawac leh oo ka kala gaaray dhinacyada, iyadoo sidoo kale la sheegay in weerarka uu sababay cabsi iyo kala carar dadka deegaanka ah.
Degaanka Sabiid ayaa kamid ah meelaha istaraatiijiga ah ee ku yaalla duleedka Afgooye, waxaana saldhigyada halkaasi ku yaalla muddooyinkii u dambeeyay lagu xoojinayay si looga hortago weerarada Al-Shabaab. Hase yeeshee weerarkan ayaa muujinaya in kooxda Al-Shabaab ay wali awood u leedahay in ay fuliyaan weeraro qorsheysan oo ku wajahan xarumaha ciidamada.
Ilaa iyo hadda Wasaaradda Gaashaandhigga Soomaaliya iyo ATMIS (AUSSOM) kama aysan bixin war rasmi ah oo ku saabsan weerarkan.
