Laamaha ammaanka magaalada Baydhabo ayaa la sheegay inay gacanta ku dhigeen xubno looga shakisan yahay inay ku lug lahaayeen qarax xalay ka dhacay magaalada.
Qaraxa oo ahaa miino dhulka lagu aasay ayaa lala beegsaday Taliyaha Booliiska Baydhabo, Cali Taagey, xilli uu ka soo baxay gurigiisa, kuna sii jeeday saldhig ciidan oo ku yaalla xaafadda Xero Jaad.
Saraakiil ka tirsan laamaha ammaanka oo diiday in magacyadooda la shaaciyo ayaa sheegay in mid ka mid ah dadka la qabtay si gaar ah loola xiriirinayo qaraxa, kadib baaritaanno ay sameeyeen ciidamada ammaanka.
Saraakiisha ayaa sidoo kale sheegay in baaritaannada ay weli socdaan, isla markaana marka la soo gabagabeeyo ay warbaahinta la wadaagi doonaan faahfaahinta baaritaanka iyo sababta loo qabtay dadkaasi.
Ilaa hadda si rasmi ah looma shaacin khasaaraha ka dhashay qaraxa.
Dowladda iyo laamaha ammaanka ayaan weli si rasmi ah u xaqiijin khasaaraha ka dhalatay qaraxa.
