Madaxweynihii hore ee Galmudug Cabdikariim Xuseen Guuleed ayaa warqad furan u diray Madaxweynaha Soomaaliya Xasan Sheekh Maxamuud, isagoo kaga hadlay dhaliil xoogan uu u haayo Dowladda iyo jihada ay hadda kuwado Siyaasadda dalka.
Guuleed oo door weyn ku lahaa abaabulka siyaasadeed ee bilawgii hore ee lagu taageeray in Xasan Sheekh talada dalka qabto, isla markaana muddooyinkii u dambeeyay ahaa ergayga gaarka ah ee Madaxweynaha u qaabilsan wada hadallada Somaliland, ayaa walaac xooggan ka muujiyey jihaynta dalka.
“Mudane madaxweyne…. Anigoo ka mid ah saaxiibada kuugu aqoonta badan dadka siyaasadda ku jira maanta, wax badana xeerinaya, hadana xaalka uu maanta dalku ku jiro fasax iima siinayo inaan indhaha ka qabsado, oo aan sugo inta ay wax walba ka baxayan gacanta Soomaalida.” Ayuu yiri.
Qoraalka ayaa waxaa uu intaasi ku daray” Mudane madaxweyne Doorashada halka dhinac ah ee aad haatan ku mashquulsantahay waxay dalka galin doontaa fowdo amni, firaaq maamul iyo in ummaddu sii kala foggaato, taladuna ay ka baxdo gacanta Soomaalida. Waxaan kugula talinayaa mudane madaxweyne inaad waaqica usoo laabato, doorashada dhexda soo dhigto, hormuudka siyaasadda kaalintooda siisid..”
