Wararka laga helayo degmada Afmadow ee gobolka Jubbada Hoose ayaa sheegaya in ciidamada ammaanka Jubbaland ay saaka gacanta ku dhigeen nin lagu magacaabo Cali Macalin Cali Nuur, oo la sheegay inuu ka tirsanaa kooxda argagixisada Al-Shabaab.
Ninkan oo lagu naaneysi jiray “Musamil” ayaa la tilmaamay inuu muddo ku dhow afar sano ka mid ahaa kooxda, isla markaana door ku lahaa howlahooda gudaha gobolka.
Howlgalka lagu qabtay eedeysanahan ayaa qeyb ka ah dadaallada joogtada ah ee ay ciidamada Jubbaland ku xoojinayaan amniga deegaannada ay ka taliyaan, gaar ahaan la dagaallanka maleeshiyaadka Al-Shabaab.
Taliyaha Ciidamada Daraawiishta Jubbaland ee Afmadow, Mahad Islaam, ayaa warbaahinta u sheegay in howlgalka lagu qabtay horjoogahan uu yimid kadib xog ay ka heleen shacabka deegaanka. Taliyaha ayaa sidoo kale xusay in ciidamada ay sii xoojin doonaan howlgallada ka dhanka ah Al-Shabaab si loo sugo amniga gobolka.
Howlgalkan ayaa qeyb ka ah dadaallada joogtada ah ee ay ciidamada Jubbaland ku doonayaan in ay ku wiiqaan awoodda Al-Shabaab, isla markaana lagu xaqiijiyo nabadgelyo waarta oo ka hanaqaadda deegaannada ay ka taliyaan.
