Dagaal xooggan oo saacado badan qaatay ayaa tan iyo ilaa saaka ka socda buuraha Xabley ee degmada Ufayn ee gobolka Bari, kaasi oo u dhexeeya ciidamada Puntland iyo Maleeshiyaadka Daacish.
Dagaalka oo si gaar ah uga dhacay degaanka Dhaban-qooxle ee buuraha Xabley, kaddib markii koox ka tirsan maleeshiyaadka Daacish soo weerareen saldhig ciidan, oo ay cutubyo ka tirsan ciidamada Puntland ku leeyihiin Dhaban-qooxle.
Ciidamada difaaca Puntland oo heegan sare ku jiray ayaa ka hortagay weerarka ka yimid kooxda Daacish, waxaana la sheegay in dagaalka lagu dilay dagaallamayaal ka tirsan Kooxda, iyadoona weli la soo werinayo inuu socda dagaalka.
Ugu yaraan hal askari oo ka tirsan ciidamada difaaca Puntland ayaa sidoo kale ku dhintay dagaalkaasi oo weli socda, halka ay ku dhaawacmeen ilaa 6 askari oo kale, kuwaasi oo qaarkood dhaawacyo fudud qabaan, sida ay sheegayaan wararka.
Ma jiro weli wax war ah oo ka soo baxay laamaha ammaanka ee maamulka Puntland.
