Wararka laga helayo deegaanka Ceel Hareeri ee Gobolka Hiiaan ayaa sheegaya in halkaasi uu ka socdo dagaal culus oo u dhaxeeya ciidamada deegaanka ee Macawiisleyda iyo maleeshiyaadka Al-shabaab.
Dagaalka ayaa qarxay kaddib markii ciidanka Macawiisleyda ay weerar ku qaadeen kooxo katirsan Al-shabaab oo la sheegay inay isku uruursanayeen duleedka deegaanka Ceel Hareeri, Sida ay wararku sheegayaan.
Dagaalka ayaa ah mid xooggan oo labada dhinacba ay isku adeegsanayaan hub culus, iyadoo dhawaqa rasaasta laga maqlayo deegaanno ka fog goobta lagu dagaallamayo.
Wararka hordhaca ah ayaa sheegaya inuu jiro khasaare isugu jira dhimasho iyo dhaawac, inkasta oo aan si rasmi ah loo xaqiijin karin tirada rasmiga ah ee khasaaraha, maadaama uu dagaalku wali socdo.
Dagaalkan ayaa kusoo beegmaya iyadoo maanta si weyn looga ciidayo guud ahaan dalka, gaar ahaan munaasabadda Ciidul Adxaa, hase yeeshee dadka deegaanka Ceel Hareeri ayaa ciiddooda ku waabariistay rasaas iyo dagaal ay ku doonayaan in ay isaga xoreeyaan Al-shabaab.
Gobolka Hiiraan ayaa haatan noqday meesha kaliya ee uu si rasmi ah uga socdo dagaal toos ah oo ka dhan ah kooxda Al-shabaab, waxaana hoggaanka dagaalkaasi sida muuqata sii wada ciidamada deegaanka ee Macawiisleyda Gobolka Hiiraan, iyagoo aan helin garab muuqda oo ka yimaada dowladda federaalka ama beelaha kale ee deriska la ah.
