War-saxaafadeed ay soo saartay Wasaaradda Arrimaha Dibadda Soomaaliya maanta oo ay taariikhdu tahay 19 March 2026, ayaa lagu sheegay in Iiraan ay weerarro ku beegsatay kaabayaasha tamarta ee Sacuudiga, Qatar iyo Imaaraadka Carabta.
Dowladda Federaalka Soomaaliya ayaa falalkan ku tilmaantay kuwo xadgudub ku ah sharciga caalamiga ah isla markaana halis gelinaya amniga iyo xasilloonida guud ee gobolka.
Soomaaliya waxay sidoo kale caddeysay inay garab taagan tahay dowladaha iyo shucuubta dalalkaasi, iyadoo taageertay dadaallada lagu ilaalinayo madaxbannaanidooda iyo badbaadada kaabayaasha muhiimka ah.
War-saxaafadeedka ayaa lagu xusay muhiimadda ay leedahay in si deg-deg ah loo yareeyo xiisadda (de-escalation) isla markaana la bilaabo wadahadal diblomaasiyadeed, si loo ilaaliyo amniga marin-biyoodka iyo xasilloonida sahayda tamarta ee caalamka.
Ugu dambeyn, Dowladda Soomaaliya ayaa sheegtay inay ka go’an tahay la shaqeynta beesha caalamka iyo dowlad-goboleedyada si loo xoojiyo nabadgelyada loona ilaaliyo kaabayaasha tamarta ee muhiimka u ah dhaqaalaha adduunka.
