Hay’adda Duulista Rayidka Soomaaliyeed ayaa soo saartay qoraal rasmi ah oo lagu shaaciyay in si buuxda loo xirayo Garoonka Diyaaradaha Aadan Cadde ee magaalada Muqdisho maalinta Khamiista, oo ku beegan 25-ka December.
Hay’addu waxay sheegtay in hakinta shaqada garoonka ay la xiriirto doorashada la filayo in ay ka dhacdo magaalada Muqdisho maalintaas, taas oo u baahan diyaar-garow amni iyo maamul oo gaar ah.
Warqad rasmi ah oo arrintan la xiriirta ayaa loo diray dhammaan shirkadaha diyaaradaha iyo shirkadaha ka shaqeeya iibinta tikidhada, si ay ula socodsiiyaan rakaabka una qaataan tallaabooyinka ku habboon.
Dhanka kale, Wasaaradda Waxbarashada Soomaaliya ayaa horey u soo saartay go’aan la mid ah, kaasi oo lagu hakiyay dhamaan dugsiyada waxbarashada dalka maalinta Khamiista, sababo la xiriira isla doorashadaas.
Sidoo kale, Booliska Soomaaliya ayaa sheegay in maalinta Khamiista la xiri doono wadooyinka waaweyn ee magaalada Muqdisho, iyadoo la adkeyn doono amniga guud ee caasimadda.
Mas’uuliyiinta ayaa ugu baaqay shacabka in ay la shaqeeyaan hay’adaha ammaanka, islamarkaana ay qaataan wacyigelin ku saabsan isbeddellada ku-meelgaarka ah ee la xiriira isu-socodka iyo adeegyada maalintaas.
