Maxkamadda Ciidamada Qalabka Sida ee Soomaaliya ayaa saaka magaalada Muqdisho ku fulisay xukunnadii dilka toogashada ahaa ee horay loogu riday Xasan Cali Iftiin Buule iyo Xasan Cali Ibraahim Maxamed Axmed, kuwaas oo lagu helay dilal iyo qaraxyo ka dhacay caasimadda.
Mas’uuliyiinta maxkamadda ayaa sheegay in raggan lagu helay dambiyo culus oo sababay dhimasho iyo dhaawac soo gaaray shacabka Soomaaliyeed, waxaana lagu fuliyay xadka qisaasta ah ee ay hore u go’aamisay maxkamaddu.
Fulinta xukunka ayaa ka dhacday fagaaraha toogashada ee Muqdisho, iyadoo ay goobjoog ka ahaayeen saraakiil ciidan iyo masuuliyiin ka tirsan Maxkamadda Ciidamada.
Maxkamadda Ciidamada Qalabka Sida ayaa sheegtay in fulinta xukunkan ay qayb ka tahay dadaallada lagu xaqiijinayo caddaaladda iyo la dagaallanka falalka dilalka iyo qaraxyada ay geystaan kooxaha argagixisada, oo ay ku tilmaantay “Khawaarij,” kuwaas oo ka dhaca caasimadda iyo guud ahaan dalka.
Horey maxkamada ciidamada ayaa xukunno dil ah ku fulisay xubno ka tirsanaa maleeshiyaadka Al-Shabaab oo lagu helay dambiyo la xiriira dilal, qaraxyo iyo falal amni darro.
Maxkamadda Ciidamada Qalabka Sida ayaa inta badan qaadda kiisaska la xiriira askarta Ciidamada Qaranka iyo xubnaha ka tirsan kooxaha argagixisada, iyadoo ujeeddadu tahay dardar-gelinta caddaaladda iyo la xisaabtanka dembiyada culus ee khatar ku ah amniga dalka.
