Dowladda Federaalka Soomaaliya ayaa sii waddo ballaarinta saameynteeda gudaha maamulka Puntland, iyadoo la sheegay inay qaaday tallaabooyin cusub oo la xiriira dhinacyada amniga iyo ciidamada.
Wararka ayaa sheegaya in dowladda ay askar cusub ka qoratay degmada Jariiban ee gobolka Mudug, kuwaasi oo la tababaray isla markaana hub la siiyay.
Sidoo kale, Dowladda Federaalka ayaa la sheegay inay saameyn ku leedahay qaybo kamid ah ciidamada Puntland, iyadoo qaar kamid ah ciidamadaasi mushaharkooda laga bixiyo Muqdisho.
Madaxweynaha Puntland ayaa lagu warramay inuusan ku qanacsanayn dhaq-dhaqaaqyada dowladda federaalka, arrintaas oo lala xiriirinayo khilaafka siyaasadeed ee u dhexeeya Puntland iyo Villa Soomaaliya.
Warbixinta ayaa sidoo kale sheegaysa in xiriirka dhaw ee Puntland la leedahay uu qayb ka yahay walaaca jira, maadaama Imaaraadka lagu tilmaamay inuu kasoo horjeedo siyaasadaha dowladda federaalka ee hadda jirta.
Dhanka kale, Dowladda Federaalka ayaa dadaal ugu jirta dib u dhiska qeybaha ciidamada xoogga dalka Soomaaliyeed, kuwaasi oo kala ah qeybta 43-aad ee Jubbaland, qeybta 60-aad ee Koonfur Galbeed, qeybta 27-aad ee Hirshabelle, qeybta 21-aad ee Galmudug, qeybta 54-aad ee Puntland iyo qeybta 56-aad ee Somaliland.
