Golaha Mustaqbalka Soomaaliyeed ayaa war-saxaafadeed ay soo saareen ku sheegay inay si cad uga soo horjeedaan isku day kasta oo lagu kordhinayo muddada xilka hay’adaha dowladda, gaar ahaan Baarlamaanka Federaalka iyo Madaxweynaha Soomaaliya, taas oo ka hor imaanaysa Dastuurka Ku-Meel-Gaarka ah ee 2012.
Goluhu wuxuu xusay in sida uu qabo dastuurka, muddada xilka Baarlamaanka Federaalka ay ku eg tahay 14 Abriil 2026, halka muddada xilhaynta Madaxweynaha ay ku eg tahay 15 May 2026. Waxay carrabka ku adkeeyeen in ixtiraamka dastuurka iyo qabashada doorashooyin waqtigooda ku dhaca ay yihiin tiirka xasilloonida siyaasadeed ee dalka.
Sidoo kale, Golaha Mustaqbalka Soomaaliyeed ayaa uga digay madaxda dowladda federaalka inay ka waantoobaan tallaabo kasta oo horseedi karta muddo-kororsi ama khilaaf siyaasadeed oo halis gelin kara amniga iyo xasilloonida dalka.
Goluhu wuxuu ugu baaqay dowlad-goboleedyada inay si waafaqsan dastuurka u qabtaan doorashooyinkooda, islamarkaana la dhowro nidaamka federaalka si looga fogaado qalalaase siyaasadeed oo cusub.
Ugu dambeyn, war-saxaafadeedka ayaa lagu sheegay in Soomaaliya ay mareyso xilli xasaasi ah oo u baahan masuuliyad siyaasadeed, dulqaad iyo hoggaan leh aragti qaran, si loo ilaaliyo midnimada, xasilloonida iyo mustaqbalka dowladnimada dalka.
