Golaha Wasiirrada Xukuumadda Federaalka Soomaaliya ayaa maanta si adag u cambaareeyay safarkii uu Hoggaamiyaha Somaliland Cabdiraxmaan Maxamed Cabdillaahi (Cirro) ku tegay magaalada Qudus ee dhulka Falastiiniyiinta ay Israa’iil xoogga ku haysato.
Shirkii Golaha Wasiirrada ee maanta ayaa lagu sheegay in tallaabadaasi ay si cad uga hor imaanayso Dastuurka Jamhuuriyadda Federaalka Soomaaliya, qawaaniinta caalamiga ah iyo mabaadi’da dhowrista madaxbannaanida dalalka iyo xuquuqda shacabka ku nool dhulalka la haysto.
Golaha Wasiirrada ayaa carrabka ku adkeeyay mowqifka Dowladda Federaalka Soomaaliya ee ku aaddan taageerada qadiyadda Falastiin, iyagoo sheegay in Soomaaliya ay weli garab taagan tahay xuquuqda shacabka Falastiin iyo ilaalinta shuruucda caalamiga ah.
Dhanka kale, Golaha Wasiirrada ayaa bogaadiyay ciidamada amniga Soomaaliyeed dadaallada ay ugu jiraan xaqiijinta amniga caasimadda Muqdisho iyo guud ahaan dalka.
Golaha ayaa xusay in ciidamada ay ku guuleysteen ka hortagga falal amni-darro oo la qorsheynayay in lagu carqaladeeyo nabadgelyada iyo horumarka socda.
Golaha ayaa ugu dambeyn ku baaqay in la sii xoojiyo wada-shaqeynta hay’adaha amniga si loo adkeeyo xasilloonida dalka loona dardargeliyo horumarka iyo dib u dhiska Soomaaliya.
