Ra’isul Wasaaraha Israa’iil Benjamin Netanyahu, ayaa sheegay in aad uga xumaaday ugana naxay weerar shalay oo Khamiis ah ciidamada Israa’iil ka geesatay magaalada Qasa, kaa oo la sheegay in lagu dilay saddex qof oo shacab ah.
Qoraal uu soo saaray Benjamin Netanyahu ,ayaa ku sheegay in dalkiisu aad uga xun yahay in hoobiyo lagu garaacay halka kaniisad ee kaatooliga ee kutaalla magaalada Qasa, waxaana kaniisadaasi lagu dilay saddex qof oo gabbaad ka dhiganayay dhismaha kaniisada.
Waxa uu sheegay in uu aad uga naxay ugana xunyahay in kaniisada ku dhintaan dad aan waxba galabsan, waxa uuna tacsi gaar ah u diray ehelada dadkii ku dhintay weerarka ciidamada Israa’iil ku qaadeen dhismaha kaniisada kutaalla Qasa.
“Naf kasta oo go’aday iyadoo aan waxba galabsan waa musiibo, waxaan murugada la qeybsaneynaa qoysaska dadka ku dhintay kaniisada Qasa kutaalla” ayuu ku yiri qoraal uu soo saaray Ra’isul Wasaaraha Israa’iil.
Ra’isul Wasaaraha Israa’iil, ayaa caddeeyay in baaritaanno lagu sameenayo weerarka ka dhacay kaniisadda kutaalla magaalada Qasa, waxa uuna ballanqaaday in ay ilaalin doonaan dadka rayidka ah iyo sidoo kale goobaha cibaadada.
Weerarkan Israa’iil ka geesatay dhismaha kaniisatada kaatooliga ee Qasa , ayaa shalay oo Khamiis aheyd ka dhacday magaalada Qasa, waxaana dad badan layaab ku noqotay in Israa’iil ka naxdo geerida saddex qof oo kaniisad lagu dhax dilay, halka maalin kasta ay disho boqolaal Muslimiin shacab ah oon waxba galabsan.
