Ra’isul Wasaaraha Xukuumadad Federaalka Soomaaliya Xamse Cabdi Barre iyo madaxda maamulka Khaatumo, ayaa isla gartay in xabsiyada magaalada Laascaanood laga sii daayo 25-ruux oo kamid ah maxaabiistii Somaliland looga qabtay dagaalkii ka dhacay gobolka Sool.
Maxaabiista la siideynayo ayaana lagu wareejiyay Ra’isul Wasaaraha Soomaaliya Xamse Barre, waxaana la filayaa maxaabiistan in dowladda Federaalka Soomaaliya ku wareejiso Somaliland ayna dib ula midoobaan ehelkooda oo ay muddo kala maqnaayeen.
Maamulka Khaatumo, ayaana faahfaahin dheeraad ah waxa ay ka bixiyeen cidda ay yihiin maxaabiista Somaliland laga hayo ee lasii deynayo iyo waxa lagu xulay, waxa ayna sheegeen in maxaabiista lasii deynayo yihiin kuwa daruufo gaar ah heestaan.
Wasiirka Cadaaladda iyo Dastuurka ee SSC-Khaatumo, Gen. Cabdi Xasan Xijaar , ayaa shaaciyey in dhammaan maxaabiistaani la sii deynayo aysan ahayn kuwa heshiis nabadeed ku baxaya, haseyeeshee lagu sii dayn doono duruufo bini’aadannimo sida uu hadalka u dhigay.
“Maxaabiista la sii daynayo, maahan kuwa heshiis iyo maxaabiis is dhaafsi ku baxayam waxaa lagu sii daynayaa arrimo bini’aadannimo, kuwaasi oo dhammaan qaba duruufo gaar ah”, Ayuu yiri Wasiirka Cadaaladda iyo Dastuurka ee Maamulka SSC-Khaatumo, Gen. Cabdi Xasan Xijaar.
Maamulada Somaliland iyo Khaatumo, ayaa maxaabiis badan ku kala qabsaday dagaalkii dhiigga badan ku daatay ee ka dhacay magaalada Laascaanood, waxaana maxaabiista lakala heesto ku jira saraakiil iyo dad kale oo labada dhinacba caan ka ahaa.
