Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cabdi Cali, ayaa maanta kulan fogaan-arag ah la yeeshay Wasiirka Arrimaha Dibadda ee Jamhuuriyadda Koonfur Kuuriya, Mudane Dr. Cho Hyun.
Kulankan ayaa diiradda lagu saaray xoojinta xiriirka laba geesoodka ah ee u dhexeeya Soomaaliya iyo Koonfur Kuuriya, iyo ballaarinta iskaashiga dhinacyo kala duwan leh.
Labada wasiir ayaa sidoo kale ka wada hadlay arrimo ay ka mid yihiin joogitaanka ciidamada badda ee Koonfur Kuuriya ee Gacanka Cadmeed, iyo xaaladaha guud ee gobolka iyo kuwa caalamiga ah.
Wasiirka Arrimaha Dibadda ee Koonfur Kuuriya ayaa mar kale adkeeyay ixtiraamka buuxa ee dalkiisa uu u hayo madaxbannaanida, midnimada dhuleed iyo qaranimada Jamhuuriyadda Federaalka Soomaaliya, isagoo carrabka ku adkeeyay ka go’naanshaha Koonfur Kuuriya ee sharciga caalamiga ah iyo mabda’a faragelin la’aanta arrimaha gudaha ee dalalka kale.
Kulankan ayaa qeyb ka ah dadaallada Dowladda Federaalka Soomaaliya ay ku xoojinayso xiriirrada diblomaasiyadeed ee ay la leedahay saaxiibada caalamka, isla markaana ay ku difaacayso qaranimada iyo midnimada dalka.
