Kulankii maanta ee Golaha Shacabka Baarlamaanka Federaalka Soomaaliya ayaa baaqday kadib markii kooramkii loo baahnaa uusan dhameystirmin. Sida uu ku dhawaaqay Guddoomiyaha Golaha Shacabka, Sheekh Aadan Maxamed Nuur (Aadan Madoobe), waxaa kaliya soo xaadiray 120 xildhibaan, halka kooramku u baahan yahay ugu yaraan 139 mudane.
Guddoomiyuhu wuxuu si kulul ugu baaqay xildhibaanada maqnaa in ay xil iska saaraan waajibaadkooda dastuuriga ah oo ay waqti hore u yimaadaan fadhiyada, si howlaha muhiimka ah ee horyaalla Golaha looga doodo oo go’aanno loogu gaaro.
“Waxaa nasiib darro ah in marar badan uu dib u dhac ku yimaado shaqadii Golaha sababo la xiriira maqnaanshaha xildhibaano aan muujin xilkasnimo. Waxaan mar kale ugu baaqayaa dhammaan xildhibaanada aan joogin in ay waajibaadkooda gutaan oo ay si joogto ah uga soo qeybgalaan fadhiyada Golaha,” ayuu yiri Guddoomiyuhu.
