Maxkamadda Darajada Koowaad ee Ciidamada Qalabka Sida ayaa maanta xukun dil ah ku riday Ex Dable NISA Maxamed Buulle Muumin, oo loo haystay fal dil iyo dhaawac culus oo ka dhacay magaalada Kismaayo sanadkii 2023.
Eedeysanaha ayaa lagu helay dambiga dilka Alifle NISA Maxamed Kaariye Maxamed (Sharafoow), iyo dhaawaca Dable NISA Maxamed Cabdullaahi Maxamed iyo Alifle NISA Cabdullaahi Axmed Cabdiqaadir (Ilkacase), weerar ka dhacay 20-kii June 2023, xilli saqdhexe oo ay hurdayeen marxuumka iyo dhaawacyadu.
Warbixinta maxkamadda ayaa muujisay in eedeysanuhu ku dooday muran dhul oo kala dhaxeeyay marxuumka inuu sabab u ahaa dilka. Ka dib falkaas, Buulle ayaa ka baxsaday magaalada Kismaayo, isaga oo isku dhiibay Khawaarijta, kuna wareejiyay qorigii dowladdu siisay, halkaasna looga duubay muuqaal uu ku aflagaadeeyay marxuumka.
Kadib muddo uu ku dhuumaaleysanayay, ayaa ciidamada ammaanka ka soo qabteen deegaanka Ceelasha Biyaha ee duleedka Muqdisho, 19-kii April 2025.
Maxkamadda Darajada Koowaad ayaa maanta ku dhawaaqday in Maxamed Buulle Muumin lagu xukumay dil toogasho ah.
