Ururka Midowga Afrika ayaa si kulul uga hadlay wararka sheegaya in Isra’iil ay qorsheyneyso inay magacowdo wakiil diblomaasiyadeed oo loo diri doono Somaliland, tallaabadaas oo lagu tilmaamay mid khatar ku ah xasilloonida gobolka.
Bayaan rasmi ah oo ka soo baxay Guddiga Midowga Afrika ayaa lagu muujiyay walaac xooggan, iyadoo si cad loo cambaareeyay qorshahaas. Guddigu wuxuu carrabka ku adkeeyay in ururku si buuxda u ixtiraamayo madax-bannaanida, midnimada iyo wadajirka dhuleed ee Soomaaliya, sida ku cad dastuurka Midowga Afrika iyo shuruucda caalamiga ah.
Midowga Afrika ayaa sidoo kale mar kale xaqiijiyay inuusan aqoonsanayn Somaliland inay tahay dal madax-bannaan, isagoo tilmaamay in tallaabo kasta oo hal dhinac ah—gaar ahaan aqoonsi diblomaasiyadeed—ay tahay mid “aan waxba ka jirin” isla markaana wax u dhimi karta amniga iyo deganaanshaha gobolka Geeska Afrika.
Guddigu wuxuu xusay go’aankii ka soo baxay kulankii 1324-aad ee Golaha Nabadda iyo Amniga ee Midowga Afrika ee dhacay 6-da Janaayo 2026, kaasoo si cad uga digay tallaabooyinka noocan ah.
Ugu dambeyn, Midowga Afrika ayaa ku celiyay ballanqaadkiisa ku aaddan taageerada uu siiyo Soomaaliya, gaar ahaan dhinacyada nabadda, dowlad-dhiska iyo xoojinta midnimada qaranka.
Warbixintan ayaa imaneysa xilli ay sii kordhayaan walaacyada la xiriira faragelinta dibadda iyo saameynta ay ku yeelan karto xaaladda siyaasadeed ee gobolka.
