Madaxweynaha maamulka Puntland Saciid Cabdullaahi Deni ayaa amray in Ciidamada cabashada ka muujiyay daryeel la’aanta caafimaad loo soo raro magaalada Garoowe, lana hubiyo xaaladooda caafimaad, daryeel iyo wixii baahidooda ah, Guddiga daryeelka Ciidamada Hawlgalka Ciribtirka Argagixisada ee Puntland, ayaana ka hawlgalay, sida lagu sheegay qoraal lagu daabacay Taliska Howlgalka Ciribtirka Argagixisada ee Puntland.
Sidoo kale warka ayaa lagu yiri ” Guddiga daryeelka Ciidamada Hawlgalka kujira ayaa tan iyo illaa markii hawlgalka bilowday u taagnaa caafimaadka iyo daryeelka Ciidankeenna geesiyaasha ah ee kusoo dhaawacmay hawlgalka, kuwaasi oo lagu daweynayo dalka, Iyadoo kuwa dalka wax looga qaban waayona loo diray dalalka Itoobiya iyo India, oo weli Ciidanka qaar ku lagu daaweynayo”.
Warka ayaa ku soo aadaya xili maanta ciidamada ku soo dhaawacmay dagaalka ka socda Buuraleyda Calimiskaad ay banaanbax cabasho ah ka dhigeen Magaalada Boosaaso, iyagoo ka cabanayay daryeel la’aan caafimaad, waxayna xirteen wadada laamiga ah ee hormarta isbitaalka guud ee Boosaaso, Waxayna ku eedeeyeen guddigii Taakuleynta ciidamada ee Puntland in ay lunsadeen dhaqaalihii shacabka Puntland ugu dhiibeen ciidamada.
