Madaxweynaha Soomaaliya Xasan Sheekh Maxamuud ayaa xalay kulan la qaatay Madaxweynaha Hirshabeelle Cali Cabdullaahi Xuseen Cali Guudlaawe iyo Guddoomiye Ku-xigeenka Labaad ee Baarlamaanka Hirshabeelle, Mahad Xasan Cismaan.
Kulanka ayaa diiradda lagu saaray xaaladda siyaasadeed ee Hirshabeelle, muhiimadda xasilloonida iyo wada-tashiga siyaasadeed, iyo sidii loo sii xoojin lahaa wada-shaqeynta iyo iskaashiga u dhexeeya Dowladda Federaalka Soomaaliya iyo Dowladda Hirshabeelle.
Kulankan ayaa ku soo aadaya xilli Madaxweynaha Hirshabeelle Cali Guudlaawe uu wajahayo diidmo siyaasadeed oo xooggan, taas oo uga imaanaysa siyaasiyiin, waxgarad iyo qaybo ka mid ah dadka ku nool Gobolka Hiiraan.
Dhinacyada kasoo horjeeda maamulka Cali Guudlaawe ayaa muddooyinkii dambe soo bandhigay cabashooyin la xiriira hannaanka siyaasadeed ee Hirshabeelle iyo arrimaha doorashada, iyagoo dalbanaya in go’aannada siyaasadeed ee gobolka lagu saleeyo wada-tashi iyo heshiis ballaaran.
Kulanka Xasan Sheekh iyo madaxda Hirshabeelle ayaa sidoo kale imanaya iyadoo ay sii kordhayaan doodaha ku saabsan mustaqbalka siyaasadeed ee Hirshabeelle iyo hannaanka loo wajahayo doorashooyinka soo socda.
Xukuumadda Federaalka Soomaaliya ayaa horey u adkaysay muhiimadda ay leedahay in dowlad-goboleedyada iyo dowladda dhexe ay yeeshaan wada-shaqeyn iyo isku-duubni, halka dhinacyada mucaaradka ah ay ku baaqayaan in xal siyaasadeed laga gaaro khilaafaadka ka jira qaar ka mid ah dowlad-goboleedyada
