Hay’adda Sirdoonka iyo Nabadsugidda Qaranka Soomaaliya (NISA) ayaa shaaca ka qaaday in cutubka gaarka ah ee Gaashaan uu xalay fuliyay howlgal qorsheysan oo ka dhacay deegaanka Dhanaane ee gobolka Shabeellaha Hoose, halkaas oo lagu burburiyay xarun ay kooxda Al-Shabaab u adeegsan jirtay kaydinta waxyaabaha qarxa.
War-saxaafadeed rasmi ah oo NISA soo saartay Isniintii ayaa lagu sheegay in howlgalka lagu saleynayay xog sirdoon oo la xaqiijiyay, taasoo muujisay in xaruntaas laga diyaarinayay weerarro halis ah oo lagu beegsan lahaa shacabka Soomaaliyeed.
“Goobta waxaa Khawaarijtu u adeegsanayeen diyaarinta waxyaabaha qarxa ee lagu dhibaateyn lahaa shacabka Soomaaliyeed,” ayaa lagu yiri bayaanka.
NISA waxay xaqiijisay in howlgalka lagu burburiyay xarunta si buuxda, islamarkaana uusan jirin wax khasaare rayid ah, taasoo muujinaysa sida ciidanku u fuliyeen hawlgalkan si xirfadeysan oo looga hortagayo shirqool weyn.
Tani waa markii labaad oo dhowaanahan lagu beegsado deegaanka Dhanaane. Bishii Juun 3-deedii, cutubka Gaashaan ayaa isla deegaankaas ka fuliyay howlgal kale oo lagu dilay sarkaal sare oo Al-Shabaab ah oo la sheegay inuu mas’uul ka ahaa hawlgallada kooxda ee Dhanaane, Jilib Marka, iyo Gandarshe.
Dowladda Soomaaliya ayaa sheegtay inay sii xoojineyso dagaalka ka dhanka ah Al-Shabaab, iyadoo laga howlgalayo qeybo badan oo dalka ka mid ah, gaar ahaan Koonfur Galbeed, HirShabeelle iyo Galmudug, iyadoo ay ka qeyb qaadanayaan ciidamada deegaanka iyo saaxiibada caalamiga ah..
