Wararka ka imaanaya degmada Garbahaarey ee xarunta gobolka Gedo ayaa sheegaya in ciidamo ka tirsan dowladda Soomaaliya ay xireen xubno ka tirsan golaha guurtida iyo odayaasha dhaqanka gobolkaasi. Odayaashan la xiray ayaa shalay si cad uga soo horjeestay qorshe ay sheegeen in dowladda Federaalka Soomaaliya ku wado dhismaha maamul cusub oo ka madax bannaan maamulka Jubbaland, gaar ahaan gobolka Gedo.
Odayaasha dhaqanka oo warbaahinta kula hadlay magaalada Garbahaarey maalintii shalay ayaa si adag u cambaareeyay waxa ay ugu yeereen “faragelin joogto ah” oo dowladda Federaalka ay ku hayso gobolka Gedo. Waxay sheegeen in qorshaha Villa Soomaaliya uu yahay mid lagu wiiqayo maamulka Jubbaland laguna abuuro maamul kale oo taageersan dowladda dhexe, iyagoo ku tilmaamay arrintaas “qorshe halis ku ah midnimada iyo xasilloonida gobolka.”
Wararka laga helayo maamulka gobolka Gedo ayaa xaqiijiyay in odayaashaasi ay xireen ciidamo ay sheegeen in ay ka mar qaataan dowladda Federaalka, inkastoo aysan jirin wax war ah ka soo baxay dowladda Federaalka oo sharaxaya sababta xarigga. Sida ay sheegeen maamulka Gobolka Gedo Jubbaland, amarka xariga waxaa bixiyay masuuliyiin sare oo ka tirsan dowladda dhexe.
Xaaladda Garbahaarey ayaa haatan noqotay mid kacsan, iyadoo bulshada deegaanka ay dareemayaan cabsi iyo walaac ku saabsan suurtagalnimada iskahorimaadyo ka dhaca degmadaasi.
Xarigga odayaasha ayaa kusoo aadaya, xili dowladda Federaalka Soomaaliya ay wado qorshe ay ku dhiseyso maamul cusub oo ka madax bannaan maamulka Jubbaland, kaas oo la rumeysan yahay in laga dhisayo gobolka Gedo. Qorshahan ayaa la sheegay in uu qeyb ka yahay dadaallo ay dowladda dhexe ugu jirto in ay saldhig siyaasadeed ka hesho gobolka Gedo.
Wararka qaar ayaa sidoo kale sheegaya in dowladda Federaalka ay qorsheyneyso in ciidamo dheeri ah loo diro qaar kamid ah degmooyinka gobolka Gedo si ay u sugaan amniga inta lagu jiro doorashada maamul cusub oo la filayo in lagu dhawaaqo Gobolka Gedo, kaasi oo ka soo horjeeda Axmed Madoobe.
Jahwareer siyaasiyadeed oo adag ayaa ka taagan gobolka Gedo, shacabka ku nool Gobolkaasi ayaa wajahaya khilaaf joogto ah oo u dhexeeya dowladda Dhexe iyo maamulka uu hoggaamiyo Axmed madoobe, taasi oo sameeyn weyn ku yeelata.
