Xeer-ilaaliyaha Guud ee Dowladda Puntland Axmed Maxamed Yuusuf (Taaran) ayaa si rasmi ah u codsaday in xasaanadda laga qaado Xildhibaan Cabdirashiid Yuusuf Jibriil, oo horey u soo noqday Guddoomiyaha Baarlamaanka Puntland.
Qoraal rasmi ah oo sumadiisu tahay XIG/DPS/36/2025 ayaa loo diray Golaha Wakiillada Puntland, kaas oo lagu codsanayo in laga qaado xasaanadda Xildhibaanka si loo horgeeyo sharciga, iyadoo lagu eedeeyay inuu galay falal culus oo khatar ku ah amniga Puntland.
Eedeymaha loo jeediyay Xildhibaanka waxaa kamid ah:
- Abaabul ciidan oo lagu carqaladeynayo amniga gobolka Sanaag.
- Faafinta sawirro iyo hadallo baraha bulshada ah oo lagu dhaliilayo Puntland isaga oo xiran dareyska ciidanka.
- Ku lug lahaansho dambiyo culus sida ku xusan qodobbada 221, 223 iyo 233 ee Xeerka Ciqaabta Soomaaliyeed.
Xeer-ilaaliyaha ayaa sheegay in loo baahan yahay in xasaanadda laga qaado si ciidamada ammaanku u helaan fursad ay ku soo qabtaan, loona bilaabo maxkamadeyn rasmi ah.
Warqaddan ayaa kusoo beegmaysa iyadoo Puntland ay wajahaysay xaalado siyaasadeed oo cakiran, gaar ahaan khilaafyo siyaasadeed oo ka taagnaa Baarlamaanka iyo dhaliilo uga imaanaya siyaasiyiinta mucaaradka ah.
