Wasiirka Wasaaradda Isgaarsiinta iyo Tiknoloojiyadda ee Jamhuuriyadda Federaalka Soomaaliya, Xildhibaan Maxamed Aadan Macallin (Soomaali), ayaa ka qeybgalay shirweynaha sare ee WSIS+20 oo ka socda magaalada Geneva ee dalka Switzerland.
Shirweynahan heer caalami ah, oo ay si wadajir ah u martigelinayaan Hay’adda Isgaarsiinta Caalamiga ah (ITU) iyo Dowladda Switzerland, ayaa lagu falanqeeyay horumarka dhijitaalka ah ee laga gaaray tan iyo bilowgii WSIS, iyadoo sidoo kale lagu dejinayay jihada cusub ee kobcinta Teknoloojiyadda mustaqbalka.
Intii uu shirku socday, Wasiir Maxamed Aadan ayaa kulammo miro-dhal ah la yeeshay Agaasimaha Guud ee Waaxda Horumarinta Isgaarsiinta ee ITU (BDT), Dr. Cosmas Zavazava, iyo Wasiirrada Isgaarsiinta ee dalalka Malaysia iyo Jabuuti. Kulammadan ayaa diiradda lagu saaray sidii loo xoojin lahaa barnaamijyada horumarinta dhijitaalka ah, gaar ahaan dhinacyada xirfadaha dhallinyarada, amniga internetka, iyo maamulka dowladnimada dhijitaalka ah.
Wasiir Maxamed Aadan waxa uu hoosta ka xariiqay sida ay Dowladda Federaalka Soomaaliya uga go’an tahay in ay sii xoojiso wadashaqeynta ay la leedahay ITU iyo daneeyeyaasha kale ee caalamiga ah, si isbeddelka dhijitaalka ah uu u noqdo mid waara,
Wafdiga uu hoggaaminayay Wasiirka waxaa qeyb ka ahaa Maareeyaha Hay’adda Isgaarsiinta Qaranka (HIQ) iyo Safiirka Soomaaliya u fadhiya dalalka Switzerland iyo Austria, Amb. Khadra Axmed Ducaale.
