Kooxaha gurmadka ayaa ilaa hadda soo saaray meydadka 229 qof oo ku dhintay laba dhul go’ oo ka dhacay deegaan ku yaalla koonfurta Itoobiya, sida uu BBC-da u sheegay sarkaal ka tirsan dadka deegaanka.
Dhul go’a ayaa dhacay fiidnimadii Axadda iyo subaxnimadii Isniinta, kadib markii roobab xooggan ay ka da’een dhulka buuraleyda ah ee aan la geli karin ee Gofa.
Maamulka deegaanka ayaa sheegay in baadigoobka dad nool uu “socdo” balse “tirada dhimashadu ay wali sii kordhi karto”.
Sawirro ayaa muujinayay boqollaal qof oo isugu soo baxay goobta iyo qaar kale oo dhoobada qodaya si ay u helaan dad dhoobada ku hoos jira.
Madaxa maamulka deegaanka Gofaa, Dagmaawi Ayele, ayaa BBC u sheegay in dadka dhintay ay ku jiraan dad waaweyn iyo carruur, halka 10 qof oo nolol lagu soo badbaadiyayna lagu daweynayo isbitaalka.
