Ra’iisul Wasaare Ku-xigeenka Xukuumadda Federaalka Soomaaliya, Mudane Saalax Axmed Jaamac, ayaa maanta xilka si rasmi ah ugu kala wareejiyey Wasiirka cusub ee Wasaaradda Shaqada iyo Arrimaha Bulshada, Prof Saalim Caliyow Ibrow, iyo Wasiirkii hore, Yuusuf Maxamed Aadan, munaasabad ka dhacday xarunta Wasaaradda ee Muqdisho.
Munaasabadda waxaa goob joog ka ahaa Wasiiru-Dowlaha Wasaaradda, Wasiir ku-xigeenka, Agaasimaha Guud, iyo mas’uuliyiinta kale ee ugu sarreysa Wasaaradda, iyadoo sidoo kale ay ka soo qeyb galeen xildhibaanno iyo marti sharaf kale.
Ra’iisul Wasaare ku-xigeenka ayaa xusay muhiimadda Wasaaradda Shaqada iyo Arrimaha Bulshada ay u leedahay horumarinta bulshada, isagoo u rajeeyay Wasiirka cusub inuu si hufan u fuliyo qorshaha Xukuumadda ee ku aaddan shaqo-abuurka iyo adeegyada bulshada.
Wasiirka cusub ee Wasaaradda, Prof Saalim Caliyow Ibrow, ayaa uga mahadceliyey madaxda Qaranka kalsoonida lagu aaminay, wuxuuna ballan qaaday inuu xoogga saari doono horumarinta adeegyada bulshada iyo shaqo-abuurka dhallinyarada.
