Wasiirkii hore ee Amniga Soomaaliya Cabdullaahi Maxamed Nuur ayaa sheegay in ciidamo ka tirsan dowladda Federaalka Soomaaliya ay maanta xoog ku galeen Hotel Elite oo ku yaalla xeebta Liido ee magaalada Muqdisho, isagoo ku eedeeyay dowladda inay qorsheyneyso burburin iyo boob lagu sameeyo hotelka.
Cabdullaahi Maxamed Nuur ayaa qoraal uu soo saaray ku sheegay in ciidamada galay hotelka ay wateen “hub culus, miinooyin iyo walxo lagu dumiyo dhismayaasha”, isla markaana ay gudaha hotelka isugu geeyeen shaqaalihii iyo ilaaladii ku sugneyd.
Wuxuu sheegay in tallaabadaasi aysan ahayn baaritaan amni balse ay tahay qorshe lagu burburinayo laguna boobayo hantida hotelka, kadibna lagu sawirayo hub gudaha la geliyay si loogu marmarsiyoodo howlgalka.
“Ciidamadaas waxaa soo diray Xasan Sheekh Maxamuud, isaga ayaana qaadaya masuuliyadda wixii loo geysto goobtaas ganacsi,” ayuu yiri Cabdullaahi Maxamed Nuur.
