Xildhibaan Charles Ong’ondo Were, oo ka tirsanaa Baarlamaanka dalka Kenya ayaa waxaa xalay lagu dilay magaalada Nairobi ee dalka Kenya.
Xildhibaanka ayaa la toogtay xilli uu marayay wadada Ngong ee magaalada Nairobi. Goob-joogayaal ayaa sheegay in dabley hubaysan oo saarnaa mooto Fekonta loo yaqaan ay rasaas ku fureen Xildhibaan Were, kadibna ay si degdeg ah uga baxsadeen goobta.
Xildhibaan Charles Were ayaa laga soo doortay deegaanka Kasipul ee ismaamulka Homabay, wuxuuna kamid ahaa mudanayaasha firfircoon ee Baarlamaanka dalkaas.
Ilaa iyo hadda ma jirto cid sheegatay masuuliyadda weerarka, sidoo kalena dowladda Kenya kama aysan hadlin falkan lagu dilay xildhibaanka.
Booliska ayaa bilaabay baaritaan, iyadoo cabsi laga qabo in dilkan uu horseedo xaalad kacsanaan siyaasadeed iyo amni darro oo ka dhacda qeybo kamid ah magaalada Nairobi.
