Ciidanka Xoogga Dalka Soomaaliyeed ayaa 21-kii December 2025 fuliyay howlgal qorsheysan oo si guul leh uga dhan ah maleeshiyaadka Al-Shabaab, kaasi oo ka dhacay deegaanka Jabad Godane ee hoostaga degmada Xawaadley, gobolka Shabeelle Dhexe.
Sida lagu sheegay warsaxaafadeed kasoo baxay Wasaaradda Gaashaandhigga, howlgalkan ayaa lagu dilay ku dhawaad 15 xubnood oo ka tirsanaa Al-Shabaab, kuwaas oo ay ku jireen horjoogayaal caan ku ahaa dhibaateynta shacabka iyo abaabulka falal argagixiso.
Dhagarqabayaasha lagu dilay howlgalkan waxaa ka mid ah:
Jacfar Aadan, oo ahaa horjoogihii Khawaarijta ee deegaanka Jabad Godane.
Cabdirisaaq Cali, oo u qaabilsanaa daweynta iyo daryeelka maleeshiyaadka Khawaarijta.
Daa’uud, oo ahaa horjooge ka tirsanaa maleeshiyaad ku dhuumaaleysanayay deegaanka.
Howlgalkan ayaa si weyn u wiiqay awooddii Khawaarijta Al-Shabaab ee deegaanka, gaar ahaan dhinacyada hoggaaminta, abaabulka iyo saadka, sida lagu sheegay warsaxaafadda.
Wasaaradda Gaashaandhigga ayaa xustay in howlgalkaan uu qeyb ka yahay dadaallada joogtada ah ee Ciidanka Xoogga Dalka Soomaaliyeed ay ku ciribtirayaan argagixisada, si loo xaqiijiyo nabad iyo xasillooni waarta oo ka hanaqaadda dhammaan gobollada dalka.
