Maamulka Somaliland ayaa shaaciyay inay baaris ku wadaan dil labo nin oo dhawaan ka dhacay magaalada Saylac ee gobolka Awdal, kadib fal amni oo halkaas ka dhacay.
Ciidanka Booliska Somaliland ayaa sheegay inay ku raad joogaan eedeysanayaasha ka dambeeyay dilka, isla markaana ay wadaan howlgal lagu xaqiijinayo ammaanka deegaankaasi.
Afhayeenka Booliska Somaliland ayaa warbaahinta u sheegay in gacanta lagu hayo rag lagu eedeeyay ama loo tuhunsan yahay inay ku lug lahaayeen dilka labada nin, kuwaas oo labo maalmood ka hor lagu dilay deegaanka Indho-biraale ee hoos taga degmada Saylac.
Sidoo kale, Afhayeenku wuxuu caddeeyay in rag kale oo falkaasi lala xiriirinayo ay weli baxsad ku jiraan, isla markaana ciidamada ammaanku ay si joogto ah ugu daba jiraan si loo soo qabto loona horkeeno sharciga.
Booliska Somaliland ayaa ballanqaaday inay faahfaahin dheeraad ah ka bixin doonaan natiijada baaritaanka, marka ay dhammaato, iyagoo shacabka ugu baaqay inay la shaqeeyaan hay’adaha ammaanka si loo sugo nabadda iyo xasilloonida guud ee gobolka.
