Madaxweynaha Ukraine Volodymyr Zelensky ayaa sheegay in Mareykanku doonayo in dagaalka kala dhexeeya Ruushka uu dhammaado bisha Juun, isagoo intaa ku daray in labada dhinacba lagu casuumay Mareykanka wadahadallo dhici doona toddobaadka soo socda.
“Mareykanku markii ugu horreysay ayuu soo jeediyay in labada kooxood ee wada xaajoodka Ukraine iyo Ruushka ay ku kulmaan Mareykanka, malaha magaalada Miami, toddobaad gudihiis. Annaguna waan xaqiijinay ka-qaybgalkeenna,” ayuu yiri.
Ma jirin wax faallo degdeg ah oo ka yimid Washington ama Moscow, balse Madaxweynaha Mareykanka Donald Trump ayaa ku dadaalayay in la soo afjaro colaadda tan iyo markii uu mar kale xilka la wareegay in ka badan hal sano ka hor.
Dhanka kale, Ruushku wuxuu sii waday weerarrada ka dhanka ah kaabayaasha tamarta ee Ukraine, taasoo sababtay koronto go’ ballaaran oo kale xilli cimiladu aad u qabowdahay.
Hadallo la sii daayay Sabtidii, Zelensky ayaa wariyeyaasha u sheegay waxa ka dhacay wareeggii labaad ee wadahadallada nabadeed ee uu Mareykanku dhex-dhexaadinayay, kuwaas oo Jimcihii ku dhammaaday iyada oo aan wax horumar ah laga soo sheegin, kuna qabsoomay Abu Dhabi.
Zelensky wuxuu sheegay in “arrimihii adkaa ay weli ahaayeen kuwo adag”, oo ay ka mid yihiin tanaasulaad dhuleed oo Ukraine lagu cadaadinayo inay sameyso.
Wuxuu sheegay in dhinacyadu markii ugu horreysay ka wada hadleen suurtagalnimada kulan saddex geesood ah oo ay yeeshaan hoggaamiyeyaasha dalalka, halkii ay ka ahaan lahaayeen wakiillo keliya, balse wuxuu ka digay in “arrimo diyaarin ah loo baahan yahay arrintaas.
