Kulan xasaasi ah ayaa haatan waxaa uu u socdaa xubnaha Golaha Mustaqbalka Soomaaliyeed, kaasi oo ka socda Hotel Airport ee magaalada Muqdisho, waxaana ka qeybgalaya siyaasiyiin iyo hoggaamiyeyaal hore oo miisaan culus ku leh siyaasadda dalka.
Kulanka waxaa goob joog ka ah madaxweynihii hore ee Soomaaliya Sheekh Shariif Sheekh Axmed, ra’iisul wasaareyaashii hore Xasan Cali Khayre iyo Maxamed Xuseen Rooble, iyo sidoo kale madaxda dowlad-goboleedyada Saciid Cabdullaahi Deni iyo Axmed Maxamed Islaam (Axmed Madoobe).
Wararka laga helayo kulanka ayaa sheegaya in diiradda lagu saarayo is-xog-wareysi ku saabsan ujeeddada safarka wafdiga, xaaladda siyaasadeed ee ka jirta caasimadda, iyo ajandayaasha hortabinta u leh Puntland inta ay ku sugan yihiin Muqdisho.
Kulankan ayaa ku soo beegmaya xilli uu magaalada dib ugu soo laabtay Madaxweynaha Jamhuuriyadda Federaalka Soomaaliya Xasan Sheekh Maxamuud, taas oo sare u qaadaysa xiisaha siyaasadeed iyo dhaq-dhaqaaqa wadatashiyada la xiriira mustaqbalka siyaasadda dalka.
