Wasiiru Dowlaha Arrimaha Dibadda iyo Iskaashiga Caalamiga ee Soomaaliya ayaa gaaray dalka Sacuudi Carabiya si uu uga qeyb galo shir deg deg ah oo ay isugu imaan doonaan Wasiirrada Arrimaha Dibadda ee Ururka Islaamka (OIC).
Kulanka deg deg ah ee ka furmaya magaalada Jiddah ayaa looga arinsan doonaa xaaladda Falastiin, iyadoo diiradda la saari doono taageerada caalamiga ah ee xal u helidda dhibaatada Falastiin iyo tallaabooyinka deg degga ah ee lagama maarmaanka u ah.
Shacabka Falastiin ayaa wajahaya xaalad aad u adag oo ay ka mid yihiin:
Kacdoon iyo duulaanno joogto ah oo ka yimaada Israel, taasoo keentay dhimasho iyo dhaawac badan.
Qaxoonti badan oo ku sugan xeryaha, gaar ahaan Gaza, halkaas oo nolol xumo, biyo yari iyo adeegyo caafimaad oo liita ay ka jiraan.
Xannibaadyo dhaqaale iyo xad-gudubyo ka dhan ah xuquuqda aadanaha oo saameyn ku yeeshay nolol maalmeedka shacabka.
Wasiirka ayaa kulanka ka jeedin doona khudbad uu ku cadeyn doono mowqifka dowladda Soomaaliya ee ku aaddan taageerada shacabkan dhibaataysan iyo in la helo xal waara oo nabad iyo caddaalad ku saleysan.
Shirkan ayaa sidoo kale fursad u noqon doona dalalka xubnaha ka ah OIC inay ka wada hadlaan arrimaha xasaasiga ah ee amniga, xuquuqda aadanaha iyo sida ugu habboon ee ay uga qayb qaadan karaan xallinta xaaladaha sii kordhaya ee ka jira gobolka.
