Madaxweynaha dalka Kenya William Ruto ayaa sheegay in xadka u dhexeeya Kenya iyo Soomaaliya uusan dib u furmi doonin waqtigan, sababo la xiriira xaaladaha amni, khilaafaadka siyaasadeed ee Soomaaliya iyo caqabado dhanka maalgelinta howlaha amniga ah.
Ruto oo wareysi siiyay warbaahinta waqooyiga Kenya ayaa sheegay in dowladdiisu ay wali qiimeyneyso xaaladda ka jirta Soomaaliya, si loo helo isu dheellitir u dhexeeya amniga iyo ganacsiga.
“Waxaa jira dheelitir adag oo u dhexeeya amniga iyo ganacsiga, waana in labadaba la ilaaliyaa,” ayuu yiri Madaxweynaha Kenya.
Wuxuu sheegay in Kenya ay kharash badan ku bixisay sugidda amniga xadka iyo howlgalada ay ciidamada Kenya ka wadaan gudaha Soomaaliya, si looga hortago khataraha kooxaha hubeysan.
Sidoo kale, Ruto ayaa tilmaamay in xaaladda siyaasadeed ee Soomaaliya iyo kala qeybsanaanta ka jirta ay caqabad ku noqdeen dadaalladii dib loogu furi lahaa xadka labada dal.
Madaxweynaha Kenya ayaa sheegay in weli aan la helin hannaan maaliyadeed oo waara oo ay taageerayaan beesha caalamka, si loo sii wado howlaha amniga Soomaaliya, taasoo uu sheegay inay dib u dhigtay qorshaha dib u furista xadka.
Dhanka kale, wuxuu carrabka ku adkeeyay muhiimadda ganacsiga xuduudaha iyo iskaashiga gobolka, isagoo xusay in ururrada gobolka sida East African Community, COMESA iyo African Continental Free Trade Area ay muhiim u yihiin fududeynta ganacsiga iyo xoojinta dhaqaalaha gobolka.
“Ganacsigu waa faa’iido u wada leh dhammaan dalalka gobolka, waana sababta aan u dooneyno inaan yareyno caqabadaha ganacsiga,” ayuu yiri Ruto.
Madaxweynaha Kenya ayaa sheegay in dowladdiisu ay wali ka fiirsaneyso fursadaha dib loogu furi karo xadka Soomaaliya, balse ay muhiim tahay in marka hore la xaqiijiyo amniga iyo xasilloonida gobolka.
