Ciidamada Difaaca Kenya (KDF) ayaa soo gabagabeeyay tababar adag oo loogu diyaarinayay howlgalka Soomaaliya, kaas oo ka dhacay Dugsiga Ciidanka Lugta ee magaalada Isiolo.
Askartan ayaa ka howl geli doonta Soomaaliya iyagoo qayb ka ah Hawlgalka Taageerada iyo Xasilinta Midowga Afrika ee Soomaaliya (AUSSOM), waxaana loo diyaariyay inay ka shaqeeyaan mid ka mid ah deegaannada amni ahaan ugu nugul qaaradda Afrika.
Tababarka waxaa kormeeray Taliyaha Ciidamada Bartamaha Kenya, Sareeye Guud William Kamoiro, waxaana lagu baray diyaar-garowga dagaalka, ilaalinta ciidamada iyo iskaashiga shacabka iyo ciidamada. Sidoo kale waxaa la marsiiyay layliyo adag oo lagu matalayay xaaladaha dhabta ah ee ay kala kulmi karaan Soomaaliya.
Ciidamada ayaa sidoo kale tababar ku qaatay sidii ay go’aanno degdeg ah u qaadan lahaayeen marka ay la kulmaan xaalado amni oo is beddelaya, iyadoo xoogga la saaray kor u qaadista xirfadaha dagaalka iyo la tacaalidda khataraha amni ee soo kordha.
Tababarka ayaa sidoo kale diiradda lagu saaray wada-shaqeynta iyo la jaanqaadka ciidamada kale ee ka qeybgalaya howlgalka AUSSOM, si loo xaqiijiyo in si isku-duuban ay uga howlgalaan Soomaaliya.
Kenya ayaa sheegtay in Soomaaliya weli wajahdo caqabado amni iyo kuwo siyaasadeed, iyadoo Al-Shabaab ay weli maamusho deegaano badan oo ku yaalla bartamaha iyo koonfurta dalka, isla markaana sii waddo weerarrada ay ku beegsato xarumaha ciidamada iyo goobaha rayidka.
Dhanka kale, dowladda Kenya ayaa weli dib u dhigtay dib u furista xadka Soomaaliya iyo Kenya. Madaxweynaha Kenya, William Ruto, ayaa sheegay in go’aankaasi uu salka ku hayo walaaca amni iyo xaaladda siyaasadeed ee Soomaaliya oo aan weli degganeyn.
