Dowladda Federaalka Soomaaliya ayaa si adag uga hadashay fal arxan darro ah oo lagu xadgudbay sharafka iyo cirdiga gabar Soomaaliyeed, kaas oo si weyn uga caro geliyay bulshada, isla markaana muuqaallo la xiriira lagu faafiyay baraha bulshada.
Wasaaradda Qoyska iyo Hormarinta Xuquuqul Insaanka ee Xukuumadda Federaalka Soomaaliya ayaa si kulul u cambaareysay falkaasi, iyadoo sheegtay inuu si cad uga hor imaanayo diinta Islaamka, dhaqanka suubban ee Soomaaliyeed iyo xuquuqda aas-aasiga ah ee muwaadiniinta.
Wasiirka Wasaaradda Qoyska iyo Hormarinta Xuquuqul Insaanka, Khadiija Maxamed Al-Makhzoumi, ayaa sheegtay in falkaasi uu yahay mid aan la aqbali karin, isla markaana u baahan in si wadajir ah looga hortago.
“Falkan wuxuushnimada ah waxa uu ka hor imaanayaa diinteenna, dhaqankeenna iyo sharafka muwaadinka Soomaaliyeed, waxaana waajib nagu ah inaan si wadajir ah uga hortagno falalka noocan oo kale ah,” ayay tiri wasiiraddu.
Wasaaraddu waxay sidoo kale farriin adag u dirtay hay’adaha ammaanka, iyadoo ku amartay inay sida ugu dhaqsiyaha badan u soo qabtaan eedeysanayaasha ku lugta leh falkaasi, si loo horgeeyo hay’adaha caddaaladda.
Sidoo kale, waxay ugu baaqday waalidiinta, qaraabada iyo cid kasta oo aqoonsan karta dadka falkaasi geystay inay la shaqeeyaan laamaha amniga, isla markaana aan la siin wax gabaad ah.
Ugu dambeyn, wasaaraddu waxay adkaysay in caddaaladda la horkeeno dhammaan dadkii ku lug lahaa falkaasi, si loo muujiyo in aan la aqbali karin xadgudubyada ka dhanka ah haweenka Soomaaliyeed.
