Wasiirka Gaashaandhigga Soomaaliya, Axmed Macallin Fiqi, ayaa sheegay in ay jiraan kooxo iyo shaqsiyaad si joogto ah ugu mashquulsan sidii ay u wiiqi lahaayeen dowladnimada Soomaaliya.
Wasiirka ayaa tilmaamay in kooxahaasi ay ku jiraan kuwo uu ku tilmaamay cadow dalka ka soo horjeeda, kuwaas oo 24 saac ku hawlan burburinta nidaamka dowliga ah.
Kuwo waxaa jira cadow ah oo 24 saac ku mashquulsan inay wiiqaan dowladnimada Soomaaliya. Kuwo badan oo gooni-u-goosad ah ayaa jira oo raba inay dalka kala gooyaan,” ayuu yiri Wasiir Fiqi.
Sidoo kale wuxuu carrabka ku adkeeyay in jiraan dad kale oo doonaya inay kala qayb-qabtaan dalka, balse uu sheegay in aanay jirin cid u fulin karta damacaas.
“Waxaa jira kuwo ku mashquulsan inay dalka kala gooyaan, damacooda cid ka yeeleysa ma jirto,” ayuu raaciyay.
Wasiirku wuxuu hoosta ka xarriiqay in dowladda Federaalka Soomaaliya ay ka go’an tahay ilaalinta midnimada dalka iyo la dagaallanka cid kasta oo halis ku ah dowladnimada iyo amniga guud.
