Ra’iisul Wasaaraha Xukuumadda Jamhuuriyadda Federaalka ah Mudane Xamsa Cabdi Barre, ayaa shir muhiim ah la qaatay Guddiga Sare iyo Maamulka Akadeemiyadda Qaran ee Hoggaaminta (NLA), kaas oo ka shaqeeya horumarinta arrimaha hoggaaminta Soomaaliya.
Ra’iisul Wasaare Xamsa, ayaa maamulka iyo guddigan ka dhagaystay warbixin la xiriirta halka ay marayaan hawlaha NLA , waxayna guddiga soo bandhigeen in la dhammaystiray xarumihii uu ku hawlgali lahaa akadeemiyadd , la dajiyay manhajkiisa, islamarkaasna xarumo iyo jaamacado waaweyn oo caalami ah la gaareen heshiisyo isfaham ah.
Ra’iisul Wasaaraha ayaa mas’uuliyiinta ku bogaadiyay shaqada baaxadda leh ee ay ka qabteen akadeemiyadda , isaga oo sheegay in uu ku soo aadday markii loogu baahi badnaa:
“Waa in aan helnaa xarumo waxbarasho oo wax-ka-badel dhab ah ku sameeya nolosha dadka Soomaaliyeed, kuwaas oo sare u qaada wacyiga qofka, badela hab fakarka qaldan, soona saara qof leh tayo hoggaamineed oo danta dalka iyo dadka ku qotanta” ayuu yiri Ra’iisul Wasaaraha oo la hadlayay xubnana uu la kulmay.
Ugu dambayn, waxa uu Ra’iisul Wasaaraha XJFS kula dardaarmay xubnaha ka socda Guddiga Sare iyo Maamulka Akadeemiyadda Hoggaaminta Qaran ee (NLA) in ay la yimaadaan fikir wax looga beddelayo hab-dhaqannada bulshada ragaadiyey, kuwaas oo ay ka mid yihiin musuqmaasuqa iyo qabyaaladda.
