Guddoomiye ku xigeenka labaad ee Golaha Shacabka Baarlamaanka Federaalka Soomaaliya mudane Cabdullaahi Cumar Abshirow ayaa shir guddoomiyay kalfadhiga 6-aad kulankiisa afaraad.
Guntanka ama kooramka kulanka oo ku furmay 142-Xildhibaan ayaa Ajendihiisu waxa uu ahaa Hindise sharciyeedka shirkadaha Caymiska, Hindise Sharciyeedka Sharciga Hay’adaha Maaliyadda iyo Hindise Sharciyeedka Canshuuraha Dakhliga.
Wasiirka Wasaaradda Maaliyadda ee Xukuumadda Federaalka Soomaaliya mudane Biixi Iimaan Cige ayaa ugu horeyn mudanayaasha Golaha Shacabka ka hor akhriyay hindise sharciyeedyadan, waxa uuna sharaxaad ka bixiyay muhiimada ay u leeyihiin dhaqaalaha Qaranka iyo mideynta Canshuuraha dalka, isagoo xusay in ay kala soo tashadeen dhamaan ganacsatada Soomaaliyeed iyo qeybaha kale ee ay quseyso.
Maadaamaa sida uu qabo xeerhoosaadka Golaha Shacabka hindise sharciyeedka marka uu marayo Akhrinta koowaad uusan wax dood ah ka furneyn ayaa qaar ka mid ah Xildhibaanadda Golaha waxa ay su’aalo ku saabsan ahmiyadda hindise sharciyeedyadan ay dalka u leeyihiin iyo saameynta miisaaniyadeed ee ay leeyihiin weydiiyeen wasiirka wasaaraddq maaliyadda oo uu wehliyay Guddoomiyaha Bankiga dhexe ee Dalka.
Guddoomiye ku xigeenka labaad ee Golaha Shacabka mudane Cabdullaahi Cumar Abshirow oo kulanka soo xiray ayaa faray in hindise sharciyeedyadan lagu wareejiyo guddiyada ku shaqada leh si ay usoo diyaariyaan akhrinta labaad islamarkaana dib Golaha ugu soo celiyaan si looga doodo.
