Weerar ku bilowday qaraxyo ayaa saaka maleeshiyaadka Al-shabaab waxaa ay ku qaadeen saldhig ay ciidamada dowladda ay ku leeyihiin magaalada Awdheegle ee gobolka Shabeellada Hoose.
Goobjoogayaal ayaa sheegaya in dagaalka uu qarxay marka laga soo baxay salaada subax, iyadoona weli dhinacyada ay isku adeegsanayaan hubka noocyadiisa kala duwan.
Ilaa iyo hadda lama oga khasaaraha rasmiga ah ee ka dhashay dagaalka ka socda magaalada Awdhiigle ee gobolka shabeelada Hoose.
Dhanka kale war lagu baahiyay warbaahinta ku hadasha Afka Ciidamada xooga ayaa lagu sheegay in ciidamada ay ka hortageen weerarka Al-shabaab ay ku qaadeen degmada Awdheegle ee gobolka Shabeelada Hoose,
“Ciidanka Xoogga Dalka Soomaaliyeed ayaa si geesinimo leh u fashiliyey isku day weerar oo ay maleeshiyaadka Khawaarijta ku doonayeen inay ku dhibaateeyaan shacabka ku dhaqan degmada Awdheegle ee gobolka Shabeellaha Hoose.Maleeshiyaadka Khawaarijta oo weerarka ku soo qaaday gaadiid laga soo buuxiyey waxyaabaha qarxa ayaa la kulmay iska caabin xooggan oo ay kala hortageen geesiyaasha Xoogga Dalka. Ciidamadu waxay si feejigan u ogaadeen dhagarta cadowga, iyagoo halkaasi ku gaarsiiyay jab culus, islamarkaana baacsanaya firxadka naf-la-caariga ah ee ka haray weerarka.” Ayaa lagu yiri qoraalka
Degmada Awdheegle ayaa waxaa weli ka soconaya dagaalka u dhexeeya ciidamada xooga iyo maleeshiyaadka Al-shabaab.
