Shirar kala duwan oo uga socday Golaha Mustaqbalka Soomaaliyeed magaalada Muqdisho ayaa la isku raacay in Madasha Samatabixinta ay jawaab rasmi ah ka bixiso qorshaha Madaxweynaha Soomaaliya Xasan Sheekh Maxamuud ee ku aaddan ka qaybgalka shirka uu ku casuumay dhinacyada mucaaradka.
Madasha Samatabixinta ayaa soo dhoweysay in wadahadal dhexmaro dhinacyada Soomaaliyeed, si xal looga gaaro xaaladaha siyaasadeed ee cakiran ee dalka, iyadoo muujisay inay diyaar u tahay dadaallada lagu doonayo in lagu gaaro is-afgarad siyaasadeed.
Sidoo kale, Madasha Samatabixinta ayaa magacowday saddex xubnood oo ka mid noqonaya guddiga wadaxaajoodka ee la fariisanaya dhinaca Dowladda Federaalka, ka hor 14-ka bishan, si looga wada hadlo diyaarinta ajande ay dhammaan dhinacyadu ku qanci karaan.
Xubnaha loo magacaabay guddigan ayaa kala ah Madaxweynihii hore ee Galmudug, Cabdikariim Xuseen Guuleed, iyo labada Xildhibaan ee Cabdiraxmaan Cabdishakuur Warsame iyo Cabdullaahi Carab.
Magacaabistan ayaa muujinaysa tallaabo ay Madasha Samatabixintu u qaaday dhanka wadaxaajoodka, xilli uu taagan yahay khilaaf siyaasadeed oo xooggan oo u dhexeeya Dowladda Federaalka iyo Golaha Mustaqbalka, gaar ahaan arrimaha dastuurka, doorashooyinka iyo hannaanka siyaasadeed ee dalka.
Wadahadallada hordhaca ah ayaa la filayaa inay gogol-xaar u noqdaan go’aanka ugu dambeeya ee mucaaradku ka qaadanayaan casuumaadda Madaxweyne Xasan Sheekh ee shirka Muqdisho.
