Golaha Ammaanka ee Qaramada Midoobay ayaa lagu wadaa in uu 15-ka bishan May yeesho kulan gaar ah oo lagu gorfeynayo sidii loo heli lahaa taageero dhaqaale oo joogto ah oo la siiyo ciidamada nabad ilaalinta Midowga Afrika ee AUSSOM, kuwaas oo howlgal ka wada gudaha Soomaaliya.
Kulanka ayaa lagu soo beegay xilli ay sii kordhayaan baaqyada caalamiga ah ee ku aaddan in sanduuqa Qaramada Midoobay laga maalgeliyo howlgalka AUSSOM, halkii ay si toos ah ugu yaboohi lahaayeen dalalka reer galbeedka.
Dowladda Mareykanka ayaa diiday in ay taageerto qaraarka la filayo in golaha ammaanka la horgeeyo 15-ka bishan May. Qaraarkan ayaa ujeedkiisu yahay in miisaaniyadda ku baxeysa ciidanka AUSSOM lagu maalgeliyo sanduuqa Qaramada Midoobay, si loo helo dhaqaale deggan oo joogto ah.
Midowga Yurub ayaa ballan qaaday in ay bixiyaan $60 milyan oo kamid ah $120 milyan ee guud ahaan loo baahan yahay si loo maalgeliyo hawlgalka AUSSOM ee afarta sano ee soo socota. Waxaa sidoo kale la soo jeediyay in shirweyne caalami ah oo lagu qabanayo dalka Qatar lagu abaabulo, si loogu helo taageero dhaqaale oo dheeri ah.
Waxaa la filayaa in kulanka Golaha Ammaanka ee 15-ka May uu noqdo mid go’aanno muhiim ah ka soo baxaan, balse waxa muuqata in khilaafka u dhexeeya waddamada waaweyn ee xubnaha joogtada ka ah Golaha Ammaanka, sida Mareykanka, uu caqabad ku noqon karo qorshaha lagu taageerayo ciidamada AUSSOM ee Soomaaliya
